شعر ترکی هرکس اوز فکرین ائدیر

بیلمورم گلدی نه لر ، بیردفعه انسان باشینا!؟

دینی ایمانی گئدیب ، قالمادی مثقال قدَری!؟

یوخدیر امکانی بیری ، آیغی قاچا ال توتالار

چون اوره ک آشییانیننان ، گئدیب انصاف اثَری

هرکس اوز فکرین ائدیر ، کیمدی ائدن اوزگه خیال

ایندی ته لیک حصاری ، آلدی بیزیم دوروبَری

هامو بایقوش کیمی ویرانه ائدیب دنیاسینی

ظلمتیلن قاریشیب آتدی گون آیدین سحَری

کیمی سن دیندیریسن ، ایری باخیر سانکی داووز

ائله بیل ناشتا ایچیب بیر دولی فنجان زهَری

هانسی علت اونا باعثدی بشر دای شر اولوب

داها بار وئرمه دی قلبینده محبت شجَری

قورئییب چشمه ی خیرینده بیتیب شر قمیشی

ائله بیل دوستلاریمین واقعه دن یوخ خبَری

ایندی تبدیل اولونوب بیر تازا موجوده بیلون

دالدا شیطان، آرادا فتنه ولیک اوزده پَری

نه قانیر دیل ، نه تانیر دین ، نه ده مذهب شعارین

بو شَبَحدن اوزاغ اول ، زاهد اونین وار خطَری

زعفر نظرزاده زاهد بیستم تیر ماه یکهزارو سیصدو نودویک ه.ش

/ 0 نظر / 10 بازدید