شعر ترکی

اینجیمیشم

درد الیننن من ایچون یوخدی امان اینجیمیشم

نا چارام سرری ائدم  ، فاش و عیان اینجیمیشم

آخر ایندی جان اولوب ، خسته سیز آللاه گتیرؤن

بیر طبیبی کی ائدیم ، دردی بیان اینجیمیشم

من خطا اهلی دییردیم نئجه گور دوندی قضا

باهالیق سالدی منی ، بورجا یامان اینجیمیشم

منی دردلر آپاریر مرهم جانان نئج اولوب

اینجییب خسته قالان جسمیده جان اینجیمیشم

وارریلار میدان آلیب ظلم هارایین قوزادیلار

یوخسؤلین باتدی سسی شاه جهان اینجیمیشم

دریا تک دالغا وئریر خلقی بوغان ظلم و ستم

منی چک ساحله ای نوح زمان اینجیمیشم

دردیمیز یوزده بیری اولسا جانیم عیب ائله مز

آخی یوز درده دوا ، کیمدی تاپان اینجیمیشم

دیل خوشیدیم گورونور نور عدالت ولی حیف

بو عدالت سوزیده ، اولدی یالان اینجیمیشم

مهر آیی گلدی خدایا آچیلیب مدرسه لر

اولمؤشام شهریه دن‌ ، چوخ نگران اینجیمیشم

قورتاریب وقتی ائوین ، صابخانا اخطاری وئریب

گزیرم بیر اوجؤزین ، یاخجی یامان اینجیمیشم

خانیمین سانجیسیدی ، آز قالا دوغسین بو گئجه

ولی پولسیز جیبیمه ، اومما گؤمان اینجیمیشم

گور نه تبعیض اولونور خلقین ایچینده داد امان

بیر ی کئیف اهلی بیری ناشتا یاتان اینجیمیشم

بیری هشتر خان اتین سوپ با توکیر ملحم ایچون

بیری تویغون گوتینه حسرت اینان اینجیمیشم

دئدیم ای کاش ناهارا املت اولا ایستی چورک

دئدی آت فکرین اوغول یوخدی سوغان اینجیمیشم

لوبیا، مرجی ،نخود، ائودن اوزولدی هله لیک

آشا دَن یوخدی توکم، آغلا قازان اینجیمیشم

لاواشین کونده سی، یون گولدی ولی نرخی آغیر

بئش لاواشنان قارینی ، یوخدی دویان اینجیمیشم

پول قاچیر من قاچیرام ، سالدی نفسدن اوزؤمی             

اونا لطفیله دئیون ،گئتمه دایان اینجیمیشم

چالیشیب چوخ ولی توخ قارنینا بیر ات یئمه دیم

ویتامین سیز گوزومی آلدی دومان اینجیمیشم

زاهدم گرچه بو خلقین سوزونی طنزه دئدیم

آمما قلبیمده دولوب لخته لی قان اینجیمیشم

زعفر نظرزاده زاهد

بیست و پنجم اردیبهشت یک هزار و سیصد و نود و دو

/ 0 نظر / 9 بازدید