شعرترکی مکافات عمل

داش آتیر سان یولا هر، رهگذری ییخماق ایچون

فتنه لیک پیلله لرین ،فتح ائلئییب چیخماق ایچون

 

اوچیسان عرشیده گل ،ائیله بیر آز فرشه نظر

عاقل اول ،چؤن اؤجا یئردن یئتیشر باشه خطر

 

ائله فکر ائیلمه دنیا سن ایچؤن قالمالیدی

اَجه لؤن گلسه سنی قبر ائوینه سالمالیدی

 

اولما غافل کی مکافات عمل، هاممو یا وار

بیل کی آللاه خاطاکار، بنده لره اولمادی یار

 

چوخ عناد ائیلمه آللاه سنیلن قهر ائلییر

بوقالان زندگؤوی بالسا سنه زهر ائلییر

 

وئر بو مظلوملارین حققین اوزؤوه توشه قازان

تا کی قبرؤنده مجال اولسا بیر آز راحت اوزان

 

عدل و انصافیله رفتار ائله آللاهی تانی

فتنه لیگدن حذر ائت ،اورتالیقا سالما قانی

 

اوزؤوی حقّیده دوستلارؤوی نا حق تانیما

تشنه اولما زَلی تک ،قیرمیزی الوان قانیما

 

دنیانین فایداسی یوخدؤر ،بونا هئچ شک ائله مه

بیر قریش یئردن اوتؤر ،ال قولؤوی اولچه له مه

 

قولاغ آس قوی سنه بیر قصصه دئییم عبرت اولا

تا سنؤن تک خاطاکار لار اوخئییب درسین آلا

 

بیر نفر کامران آدیندا واریدی مؤلکی باغی

کوفلتی بیر اوزیدی بیر خانیمی دورد اوشاغی

 

دنیا دان هر نه دئسون وئرمیشیدی آللاه اونا

قاپو سیندا نوکری ، مین قویؤنؤ ، اللی دانا

 

آرپا بوغدا ییغیلیب، بیر داغ اولاردی باخانا

اوننان آرتیق دا قالاردی نئچه تای ایل چیخانا

 

شور، پنیر، قایماغی همده قاتیقی، بال کره سی

نئچه بارداغ دؤزؤلیب ،طاقچالارا گل گوره سی

 

آرتیراردی گونه گون ، مکنتینی دولتینی

خژلییردی ولی چوخ ، عززتینی شوکتینی

 

نه گلن یولچیا احسان ائله دی پاره چورک

نه ده یوخسؤللارا خیرات ائله دی قاره اؤرک

 

حیف او دولتدن اونین واردی ولی ،انصافی یوخ

یئدی مظلوملارین حققین کی اونین، قارنینا اوخ

 

گئشدی ایام دئمه لی گلدی اجل آلماقا جان

قورئییب دیر داماریندا کی آخان قیرمیزی قان

 

اوزانیب یئرده چیخیر جان بدنیننن آتانین

او کی ایمانی دینی بیر قوری مولکه ساتانین

 

اؤزؤلیب چاره سی الدن اجه له تسلیم اولؤب

تؤتؤلؤب قلبی کدردن سینه سی قانه دولؤب

 

داها عومری قوتاریب دنیانی ترک ائتمه لیدی

عزرائیل گلدی اودا سون ائوینه گئتمه لیدی

 

بؤتؤن ائولادی ییغیلدی باشینا آغلاماغا

تا اونین ئولمک همان گوزلرینی باغلاماغا

 

ساغ طرفده عیالی سولدا اوغؤل ،گلنی، قیزی

قاپوسیندا دایانیب دیر، نئچه نوکر ،کنیزی

 

دانیشاممیر ،گزیر امما گوزی هئی دوره سینی

ولی تاپمیر، نئچه یوز قوینؤ توتان توله سینی

 

قورئییب دیل دوداقی آمما وئرن یوخدی اونا

ذرره سو بلکه ایچیب ، جان تاپا هوشدان اویانا

 

باخیب حسرتله اوره کلندی گوزی، دولدی یاشا

ال آتیب تئز آغاجا ،آمما الی گئتدی بوشا

 

روح بدننن چیخانی یومدی الین آشدی گوزین

باغلاییب جار جاهازین قبر ائوینه سالدی اوزین

 

ولی من گورمه دیم هئچ بیر کفن آرتیق آپارا

گرچه غصبیله سالیبدی نئچه مؤلکی حاصارا

 

اوکی وئرمزدی گلن یولچیلارا پاره چورک

ایندی گل تورپاغین آلتیندا او کامرانی گورک

 

بیر قریش یئرده یاتیب یوخدی ایشیق روصه نه سی

بئچارا قورت قوش الیننن داریخیب حوصله سی

 

نه میتیل دن تشگی واردی نه الوان پالازی

نه قیزیلدان له یه نی واردی الا دستامازی

 

نه نوکرلر دایانیبدی قاپودا فرمان آلا

نه کنیزلر کی اونیلان گله هم صحبت اولا

 

نه توان اولمادی ائولاددا اونی یاد ائله سین

نه قالان مؤلکی اکیب اون کیمی آباد ائله سین

 

ایندی بیر یاخجی عمل دی یئتیشه فریادینا

اودا کی ذرره یوخیدی یازا دوران آدینا

 

هر بلا گلدی بیزه آنلامادیق عیلّتینی

جاهلییت شوتینا چکدیک اونین ذیلّتینی

 

اوره گی پاکلامادیق، بلکه گوناه لار پوزیلا

عوضینده یئرینه، بیر نئچه پاداش یازیلا

 

معنوییاتدان اوزاغ ،دوشمه گوزون قوربانییام

دئمه شیطانی گوروب ، حیله سینه آللانییام

 

ائله شیطان آدامین نفسیدی امماره ، آدی

سن گوناه ائیله دون امما ، اوسنی داننامادی

 

نه قدر دنیا مالی اولدی ، بیزیم همدمیمیز

او قدر زاهد اینان آرتدی بیزیم ده ، غمیمیز

 

زعفر نظرزاده زاهد فخرآبادی

بیست و یکم اردیبهشت سال هزارو سیصدونودو دو

/ 3 نظر / 10 بازدید
reza

سلام وبلاگ زیبایی داری به وبلاگ منم یه سر بزن http://godofrap1.persianblog.ir/

reza

سلام وبلاگ زیبایی داری به وبلاگ منم یه سر بزن http://godofrap1.persianblog.ir/

reza

سلام وبلاگ زیبایی داری به وبلاگ منم یه سر بزن http://godofrap1.persianblog.ir/