شعر ترکی ایشیمیز ترسه دوشوب

هروعده اتین قیمتین ارتیر گوزی دار

آللاه دا وئریر باخسون اونین هر زادی وار

آغلیردی گئجه گوندوزی همسایه ولی

بیر ایش تاپابیلمیردی دای اولموشدی دلی

مستاجیریدی ، صابخانادان زار و گیلئیلی

بو دورت بئش ایلی زندگیدن اینجیدی خیلی

بیردن یار اولوب بختی گئدیب بانک دا قالدی

اوچ آی دا بیر ائو، بیر دا ماشین زانتییا آلدی

دکتر کپی جان فطره دوشیردی یازیغا

درسین اوخئییب دکترا آلدی آجیغا

بیر ایل ائله دی بهر طبابت سپری

تیغیله کسیب ائیله دی قان مین جگری

ایندی اوزینه نوکری وار کلفتی وار

اعیانلارینان مجلس انس الفتی وار

سن باخ هله بو شهریده مسئوللارووا

اوننان سورا یان رقتیلن اوز حالووا

هم شهر اولاریندی همیده شهردارون

هم وار اولاریندی همیده هر نه وارون

بیگانه دییر معاون شهر آشینادی

دورت بئش فقره مسکن مهر آدینادی

افساری آلیبدی الینه شهری چاپیر

حق الناسا مشتاق دی اونی گوده قاپیر

مسجدده نماز اوسته ائدن ذکر خدا

نیرنگیله گوز یاشی توکن حین دعا

بیت المالی غارت ائلئییر یئل سیاغی

مظلوملاری بحرینده بوغور سئل سیاغی

هر قشر و نهادین اوزینه دولتی وار

ابزار کلک مکر و ریا حیلتی وار

زرگر گونه چیخدی قانیمین قیمتینه

پولدان کی وئریردیم خانمین زینتینه

باققال مش حسن ، یولچی ایبیش ، فالچی نه نیش

بنگاه چی حتم ، اونچی ولی ، اوغری مه میش

ایندی گونه چیخدی هاموسی کالبا حاجی

بئش یوز میلیون بانکا قویوب لاپ دای آجی

آمما ده گوروم کاری گرین سهمی نه دی؟

غم غصصه سی دردی کدَری قهری نه دی؟

آیا گئجه ده آلدی اودا سانتافانی ؟!

یا قسطه گوتیردی لگنی آفتابانی ؟!

آیا توکان آلدی نئچه میلیارد تومانا؟

یا سالدی اوزین بئش یوزه خاطر دومانا

آیا ائو آلیب راحت ایچینده اوزانیب؟

یا بنگاه آچیب حققی یئییب پول قازانیب؟

یوخ قارداش اونین آیلیقی خرجین اوده میر

چون آیه گلیب سن هله لیک بخور نمیر

پس ایندی منیم سوزلریمی ائیله قبول

زاهد بو قدَر حکمیده چوخ اولما عجول

بیلمم نییه دوز کسبیده اولمیر برکت

هرچند ائدیرم چوخلی تلاش و حرکت

زعفر نظرزاده زاهد دوازدهم بهمن ماه سال یکهزارو سیصد و نود و دو

/ 2 نظر / 5 بازدید
لعیا

خوب بود ولی من که نفهمیدم کاش با ترجمه میزاشتین

لعیا

خوب بود ولی من که نفهمیدم کاش با ترجمه میزاشتین