شعرترکی انسان و شیطان

گاه سوزلی آدام تک چابالیر ساغ سولینا

گاه کوزلی اجاق تک یانیری اوز حالینا

 

گاه حیرصی تؤتؤب خلقته دوشمانلیق ائدیر

گاه سجده ائدیب خالیقه پشمانلیق ائدیر

 

گاه آغلییؤری گاه دا کؤلیر قه قه ینن

گاه نعره چکیر گاه اوخئیؤر چه چه ینن

 

گاه خشمیله شمشیری چکیب داشه ویریر

گاه دا اگیلیب قووتیلن باشه ویریر

 

آللاه نئجه قان گوزلرینه حلقه وؤرؤب

گویا ائله بیل شیریله دعوایه دؤرؤب

 

چوخ قورخؤلی بیر هئبتی وار آللاه آمان

هاردان یؤخؤما گلدی بؤ ساعت بؤ زامان

 

من گوردؤم اونین خشمیله تورپاق یئمه گین

دردین تارییا جیننی بشردن دئمه گین

 

صبریله دایاندیم کی بیر آز خشمی یاتا

باشینده اولان فکر و خیالاتی آتا

 

بیر آز دایانیب سونراسی گئتدیم قاباغا

گورجک منی تئز وئردی زورین قاش قاباغا

 

عرض ائتدیم اونا بس نییه اولدون دَ لی سن

بو حال کی سنؤن واردی الان ئولمه لی سن

 

توخداد اوزؤوی بیر دِه گورؤم قصصه نه دیر

قلبونده اولان کینه و غم غُصصه نه دیر

 

قوی منده بیلیم مؤشکیلی آسان ائلئییم

گر دوشسه سبب دردؤوی درمان ائلئییم

 

اوولده بیر آز ایْری باخیب سونرا اوزی

آهسته گلیب حسرتیلن آشدی سوزی

 

احضار ائله دی گل سنیلن واردی سوزؤم

شیطانلیقا دای اینجیمیشم یوخدی دوزؤم

 

هر چندی منیم خلقتیم اوتداندی ولی

تورپاغدان اولانلار منی چوخ ائتدی دلی

 

سن شاعیر اوزون رتبه ی استادی وارؤن

جاهیلله لرینن فرق خدادادی وارؤن

 

دریای ادبده داها اولماز سنه تای

قوی دردیمی ایظهار ائلئییم سن اونی سای

 

عارف سن اوزؤن درک ائلییه ر سن سوزؤمی

گر یان سوله سم تؤتسؤن او آللاه گوزؤمی

 

بومحکمه ده شاکی منم قاضی سن اول

رأیؤنده اؤتؤزسامدا اگر راضی سن اول

 

من شیطان اولؤم لعنت اوخی شام وسحَر

سن انسان اولؤب زندگیمی ائتمه زهَر

 

وحی اولدی منه عززتِ انسانی آلام

قلبینده اونین خصلت شیطانی سالام

 

آمما اوزؤمی چکدی فسادین یولونا

ایندی تولا تک هئی قاچیرام ساغ سولونا

 

اگلشدی قمار اؤسته اؤتؤزدی مالینی

وؤردی باشیما الده قالان تک خالینی

 

اوننان دئدی لعنت اولا شیطانه گئنه

تحریکیله گتدی منی میدانه گئنه

 

من نئیله میشم یازدی گوناهین آدیما

آللاه اوزی چاتسین دادیما فریادیما

 

هر پیس عملین بوینوما ییخدی سبَبین

هئچ ساخلامادی بیر دفعه دوستلیق ادَبین

 

سرخوش منیلن اولدی اونؤتدی تارینی

آدم باخیب هئی چکدی بو ننگین عارینی

 

دای گوردیگی ایشلر منه ده گلدی گران

پیس قایدالاری خالقی ائتدی نگران

 

هئچ پشمان اولوب بیر بیر ینی داننامادی

قرآن اوخئییب آمما سوزین آننامادی

 

خلوتده گلیب دوشدی ادالی فئلیمه

مللت گوزینه لعنتی سالدی بئلیمه

 

هئچ بیر دئمه دی بلکه اونین آللاهی وار

نوردان یارانیب رتبه ده خلق ُ اللاهی وار

 

هئی صلح ائلئییب ظالیمه الطاف ائله دی

مظلوم بشرین حققینه اجحاف ائله دی

 

آللاهین ائوینده داشی وؤردی باشیما

شکر آللاه گوز قالدی او دیْدی قاشیما

 

لبیک دئدی آللاهه ولی ساخلامادی

بیچاره قالان بنده لری یوخلامادی

 

اوردان قاییدیب تئز منی احضار ائله دی

یولداش چیلیقا یؤز دفه اصرار ائله دی

 

قارداش بو اولان ایشدی گئدیب قان توکه سن

خلقین قارینین پاسلی پیچاقنان سوکه سن

 

اوننان وؤراسان بیر دیزؤوه بیر باشؤوا

هئی آغلییا سان یئرده ئولن قارداشؤوا

 

آخیرده ده شیطانی گتیر قوی قاباغا

هئی لعنت اوخی ، لعنت اوخی من اولاغا

 

باخ سن نئجه گور آلدی منیم مسندیمی

منننده گوزل ترویج ائدیر مکتبیمی

 

شاعیر، دئمؤرم یوخدی بو انساندا دؤزی

بیر اولسا دؤزی آمما آتیب حققی یؤزی

 

سوز چوخدی دئسم تفرقه ایجاد ائلییه ر

اوولده اونا کار غلام ایراد ائلییه ر

 

سن نظمیله یاز سوزله ریمی بیلسؤن هامو

بلکه بشرین قایداسینا گؤلسؤن هامو

 

شاعیر گئنه رحمت اوخی شیطانه هله

مننن پیسی چوخدیر هله میدانه گله

 

واللاه منی پشمان ائله دی تؤلکی بشر

دین مذهبه دؤشمان ائله دی تؤلکی بشر

 

آد مننن اولؤب آتدی بشر ایلقارینی

 پشمان ائله دی آدمی همده تارینی

 

یاز شعرؤوی احساسیله قدرین بیله نه

لعنت اوزینه شیطانا لعنت دییه نه

 

سوزلر کی ائشیتدیم منی  پشمان ائله دی

دنیاده بؤتؤن انسانا دؤشمان ائله دی

 

آخر نییه شیطان دییه انسان یاوادی

ایمانی دینی بیر قوری صحبت هاوادی

 

بیرننگیدی انسان بئله تحقیر اولؤنا

آللاهی آتیب یؤز قویا شیطان یولؤنا

 

لعنت اوخؤدیک شیطانا بیزدن قورؤنا

یوخسا دئمه دیک بیزلری سالسین تورؤنا

 

بیر ظلمی دی شیطان بئله بهتانی دییه

حیف اولدی بشر خلعت عرفانی گییه

 

واللاه گورؤرم واردی بو انساندا چوخی

انصافی آتیب عدل و مُرؤوتده یوخی

 

گر ساخلاما سا عززتِ انسانی بَشَر

ایتدن پیس اولار خصلت حیوانی بَشَر

 

من حققی وئریم شیطانا انسانم اوزؤم

شیطانیله چوخداندی کی دوشمانم اوزؤم

 

آمما چوخی شیطانین اوزین آغ ائله دی

بازارِِ فساد ، فتنه شَری داغ ائله دی

 

آلنین موهؤره ویردی ولی سویله دی یان

قالخیب ایاغا حققی دانیب ائیله دی قان

 

یاددان چیخاریب آللاهی همده بَشَری

گویا ائله بیل یوخدی جَزادن خَبَری

 

انساندا اگر اولماسا انصاف و مرووت اثری

گر شاه اولا انسانلیقا اولماز ثمری

 

ننگ اولسین او انسانلارا دنیا مالینا

عقبانی آتیب فکر ائله دی اوز حالینا

 

شیطان نه دئسه حققیده وار چؤن کی اونین

چوخلاری گئییب  خلوتیده فتنه دونین

 

دوستلیقدا سیزه موشکیلی آسان ائدیرم

بیر جمله واریمدی سوزی پایان ائدیرم

 

دنیاسی اولان آخرتی اولمییاجاق

قورخون تاریدان دنیا سیزه قالمییاجاق

 

زاهد هوشا گل چوخ دئمه قیلدیم نامازی

توتدوم اورؤجی احسانا ساتدیم پالازی

 

نیتده گرک پاکلانیب عرفانی اولا

انسان اودیر انسانلیقا ایمانی اولا

 

شعر: زعفر نظرزاده زاهد فخرآبادی

اردبیل یکم دی ماه یکهزارو سیصدو نودهجری شمسی

 

/ 2 نظر / 9 بازدید
حامد

حقا كه شيطان صد برابر انسان شرف دارد بسيار پسنديدم موفق باشيد

عارف

سلام دادا اخه شما امارتون کمه[ناراحت] یه سوال شما معمولا همه روز ها میای نت؟ اخه من دوست دارم وقتی کامنت می دم باشی و زود زود بیای...... اگه همیشه هستی بگو با چه اسمی بلینکمت[ماچ]